Kalo te përmbajtja

Politika e privatësisë

Përditësuar më 6 nëntor 2026

Mbledhim vetëm atë që na duhet që platforma të punojë. Këtu është e gjitha.

1. Kush jemi dhe cili ligj vlen

Kontrollues i të dhënave është Studentët.KS, rrjet i pavarur studentor në Kosovë. Nuk jemi portal zyrtar i asnjë universiteti.

Përpunimi i të dhënave bie nën Ligjin Nr. 06/L-082 për Mbrojtjen e të Dhënave Personale, i harmonizuar me GDPR-në. Për studentët që studiojnë në Shqipëri ose në Maqedoninë e Veriut vlen edhe ligji i atij shteti për mbrojtjen e të dhënave personale.

Për çdo kërkesë rreth të dhënave të tua na shkruaj në adresën e kontaktit në fund të kësaj faqeje. Përgjigjemi brenda 30 ditësh.

2. Çfarë mbledhim

  • Llogaria: emri, emaili, emri i përdoruesit, fjalëkalimi si hash, dhe data kur pranove Kushtet e Privatësinë (prova e kontratës).
  • Akademike: universiteti, fakulteti, viti dhe lëndët.
  • Profili që e plotëson vetë: bio, interesat, fotoja dhe kopertina.
  • Çfarë krijon: postime, komente, foto, video, materiale, pyetje, mesazhe.
  • Verifikimi: emaili studentor, data e lindjes, fotoja e ID-së studentore (ose e dokumentit që provon se je student, te studentët në Shqipëri dhe në Maqedoninë e Veriut) dhe numri i kartelës, i matrikullimit ose i indeksit (shih më poshtë). Datën e lindjes e përdorim vetëm për të kontrolluar moshën minimale (16 vjeç) dhe nuk u shfaqet përdoruesve të tjerë.
  • Karriera: CV-ja që ngarkon ose krijon, profili i karrierës dhe aplikimet që bën.
  • Moderimi: raportimet që bën ose që bëhen ndaj përmbajtjes sate, vendimet e moderimit dhe gjurma e veprimeve të administratorëve.
  • Konviktet: kur aplikon për banim, emri yt krahasohet me listën e pranimit që na jep drejtoria e konvikteve (emrat dhe, kur ka, numrat e indeksit të të pranuarve). Lista e shohin vetëm administratorët dhe fshihet më 30 korrik 2027, bashkë me qasjen e banorëve.
  • Prania: kur ke qenë aktiv për herë të fundit. Mund ta fshehësh nga cilësimet. Për statistikat e brendshme të administratorëve ruajmë edhe cilën pjesë të platformës ke hapur (p.sh. «Mesazhe», pa adresën e plotë) dhe llojin e pajisjes (telefon ose kompjuter), për 48 orë.
  • Pikët e muajit (vetëm për llogaritë e verifikuara): çdo pikë që fiton ose që anulohet ruhet me veprimin, datën dhe arsyen, që ta shohësh te historiku yt dhe që renditja të jetë e drejtë. Për pikët e kohës aktive ruajmë vetëm numrin e sekondave aktive në ditë (kur faqja është e hapur dhe e përdor me lëvizje, klikim ose tastierë), pa faqet që hap dhe pa çfarë shkruan; ky numër fshihet pas 90 ditësh. Për të zbuluar abuzimin, administratori sheh nëse disa llogari që marrin pikë kanë hyrë nga e njëjta pajisje ose rrjet, vetëm si etiketë e maskuar. Emri, universiteti dhe pikët e tua dalin te renditja e muajit, si te renditjet e Garës. Kampioni dhe Nënkampioni i muajit ruhen bashkë me statusin e kartelës së Menzës.
  • Shikimet e profilit: kur hap profilin e dikujt tjetër, i numërohet një shikim në ditë. Nuk ruajmë kush je: ruajmë vetëm datën dhe një kod të pakthyeshëm (HMAC) që nuk lidhet dot me llogarinë tënde pa çelësin e serverit dhe ndryshon nga një profil te tjetri, që i njëjti person të mos numërohet dy herë. Pronari i profilit sheh vetëm sa veta e hapën në 30 dhe 7 ditët e fundit, kurrë emrat. Hapjet nga administratorët dhe moderatorët nuk numërohen. Rreshtat fshihen pas 90 ditësh.
  • Pajisjet e hyrjes: për çdo hyrje ruajmë shfletuesin, sistemin dhe llojin e pajisjes (telefon, tablet ose kompjuter) dhe kur u përdor për herë të fundit, që ti ta shohësh te Cilësimet dhe ta mbyllësh nga larg. Nuk ruajmë IP-në aty.
  • Teknike dhe sigurie: adresa IP, shfletuesi dhe një cookie e rastësishme e pajisjes përdoren kundër abuzimit (shumë regjistrime nga e njëjta pajisje, botat) dhe për të zbatuar ndalimet. Ruhen vetëm si hash i pakthyeshëm dhe si etiketë e maskuar për administratorët (p.sh. «Chrome · Windows», «83.22.•.•»), kurrë adresa e plotë. Detajet më poshtë, te «IP-ja, pajisja dhe mbrojtja nga abuzimi».
  • Raportet e testimit: kur dërgon një problem ose sugjerim me butonin «Raporto», ruajmë tekstin tënd, faqen ku ishe, shfletuesin, madhësinë e ekranit, gjuhën, temën dhe gabimet e fundit të JavaScript-it në atë faqe.
  • Interesat te Karriera: cilat punë hap dhe cilat filtra përdor, vetëm për 90 ditë, që të të sugjerojmë punë që të përshtaten.
  • Menza: ushqimet që shënon «Po shërbehet», planet «Po shkoj në menzë», votat e javës dhe, vetëm nëse e lejon, sinjali i lokacionit (shih më poshtë).
  • Sanksionet: paralajmërimet, kufizimet dhe ndalimet e vendosura mbi llogarinë, me arsyen.
  • Email i bllokuar: kur administratori e fshin një llogari për shkelje të rëndë, emaili i saj ruhet në një listë bllokimi që e njëjta adresë të mos hapë llogari të re. Kur e fshin vetë llogarinë, nuk ruajmë asgjë të tillë.

3. IP-ja, pajisja dhe mbrojtja nga abuzimi

Pas sulmeve me bota na duhen disa kontrolle të thjeshta, dhe këtu është saktësisht çfarë bëhet. Kur regjistrohesh, kërkon një kod emaili, dërgon foton e ID-së ose hyn, serveri lexon adresën IP, llojin e shfletuesit dhe një cookie të rastësishme të pajisjes (`sks_dk`, 1 vit, pa asnjë të dhënë personale brenda saj).

Nga këto ruajmë vetëm tri hash-e të pakthyeshme (të nënshkruar me një çelës sekret që e ka vetëm serveri): të pajisjes, të IP-së dhe të IP-së me shfletuesin. Hash-et nuk kthehen dot në adresën tënde. Për administratorët ruajmë edhe një etiketë të maskuar («Chrome · Windows», «83.22.•.•»), që të dallojnë një rrjet pa e parë adresën e plotë.

I përdorim për tri gjëra: të numërojmë sa aplikime bëhen nga e njëjta pajisje ose rrjet në 24 orë (p.sh. tre regjistrime për pajisje), të ndalojmë pajisje ose rrjete që abuzojnë kur vendos administratori (me afat ose përgjithmonë, me arsye), dhe të kufizojmë sa pyetje i bëhen asistentit AI nga një IP ose pajisje në ditë, që të mos harxhohet shërbimi. Nuk i përdorim për reklama, profilizim ose gjurmim të sjelljes.

Shumë studentë ndajnë të njëjtin rrjet (konvikti, kampusi, të dhënat celulare). Prandaj kufijtë për IP janë më të gjerë se ato për pajisje dhe një ndalim rrjeti e vendos vetëm administratori, pas shqyrtimit. Nëse të ndalojmë gabimisht, na shkruaj në adresën e kontaktit.

Kush është ndaluar sheh vetëm një faqe me adresën e kontaktit. Administratori nuk mbyllet kurrë jashtë nga ndalimi i një rrjeti të përbashkët.

4. Verifikimi i identitetit

Foto e ID-së studentore dërgohet vetëm për të provuar se je student. Ruhet në ruajtje private (jo publike), nuk ka kurrë adresë të hapur dhe nuk e sheh asnjë student, as ti pasi e dërgon. Gjatë shqyrtimit e shohin moderatorët dhe administratorët.

Administratori e shqyrton foton dhe konfirmon që i njëjti person e ka edhe emailin edhe kartelën. Pas vendimit (miratim ose refuzim), fotoja e shohin vetëm administratorët dhe fshihet automatikisht 7 ditë më vonë. Fotot e vendimeve të marra më parë u fshinë të gjitha më 23 tetor 2026. Numri i kartelës mbetet derisa ta fshish llogarinë ose ta heqë administratori. Nëse e fshin llogarinë, fshihet menjëherë.

Numrin e kartelës studentore (indeksin) e lexon sistemi nga foto me Groq (shërbimi i AI që përdorim edhe te asistenti), dhe e ruan kur gjen një numër të lexueshëm, pa e shkruar moderatori. Numri ruhet derisa të fshish llogarinë ose ta heqë administratori, dhe shërben vetëm që e njëjta kartelë të mos hapë dy llogari. E sheh vetëm administratori. Nuk kërkojmë selfie dhe nuk e përdorim për asgjë tjetër.

5. Baza ligjore

  • Kontrata: llogaria, materialet dhe funksionet bazë.
  • Interesi legjitim: siguria, parandalimi i spamit, kontrolli i IP-së e pajisjes kundër botave dhe moderimi.
  • Pëlqimi: analitika opsionale, e fikur derisa ta ndezësh. Njoftimet push nuk dërgohen aktualisht.
  • Interesi legjitim edhe për listat e konvikteve: përdoren vetëm për të vërtetuar kush është pranuar në konvikt, edhe për të pranuarit që nuk kanë llogari te ne.
  • Detyrimi ligjor: kur e kërkon një autoritet kompetent.

6. Zëri i kampusit

Postimet dalin me pseudonim. Identiteti prapa tyre nuk i zbulohet asnjë përdoruesi dhe e shohin vetëm moderatorët, vetëm kur postimi raportohet për ngacmim, kërcënim ose shkelje ligjore.

7. Lokacioni i menzës

Kur hyn te faqja e Menzës, shfletuesi të kërkon vetë lejen e lokacionit, që të vlerësojmë sa e ngarkuar është menza. Nuk lexohet asgjë pa lejen tënde: nëse e refuzon, Menza punon njësoj dhe nuk të kërkojmë gjë tjetër. Pas lejes, pajisja jote e kujton zgjedhjen për 24 orë dhe pas tyre kërkohet prapë.

Lokacioni lexohet vetëm kur faqja e Menzës është e hapur dhe e dukshme, kurrë në sfond dhe kurrë te faqet e tjera. Koordinatat e sakta nuk dërgohen te serveri dhe nuk ruhen: pajisja jote i krahason me zonën e menzës dhe dërgon vetëm «jam brenda» ose «jam jashtë».

Ky sinjal është anonim: nuk ruhet bashkë me llogarinë, emrin ose profilin tënd. Ruhet vetëm një kod i rastësishëm që krijon pajisja jote (ndryshon çdo 24 orë), po ose jo dhe ora, që e njëjta pajisje të mos numërohet dy herë. Rreshtat fshihen brenda një ore dhe nuk mbahet histori e lëvizjeve.

Të tjerët shohin vetëm një vlerësim të ngarkesës (e ulët, mesatare, e lartë) dhe një numër pajisjesh, kurrë emrin ose vendndodhjen tënde. Është vlerësim nga studentët që e lejojnë, jo numri i të gjithë atyre që janë në menzë.

Mund ta ndalosh kur të duash nga cilësimet e shfletuesit për këtë faqe (ikona pranë adresës). Nuk e përdorim lokacionin për reklama, profilizim, ndjekje të pjesëmarrjes ose qëllime të tjera.

8. Mesazhet dhe thirrjet

Mesazhet private i shohin vetëm pjesëmarrësit e bisedës. Administratorët nuk i lexojnë, përveç kur një mesazh na raportohet ose kur e kërkon ligji. Mesazhet ruhen të mbrojtura në server, por nuk janë të enkriptuara skaj-më-skaj.

Thirrjet zanore dhe video lidhen kur është e mundur drejtpërdrejt mes dy pajisjeve. Për këtë, pajisja jote dhe ajo e personit tjetër shkëmbejnë adresat IP. Thirrjet nuk regjistrohen.

9. Kujt ia japim

Nuk i shesim të dhënat e tua dhe nuk ua japim reklamuesve. Reklamuesit shohin vetëm shifra të agreguara.

  • Strehimi dhe baza e të dhënave: Vercel dhe Neon (serverat në Frankfurt). Ruajtja e skedarëve: Vercel Blob.
  • Emaili (kodet e konfirmimit, password-i i harruar): Resend dhe Gmail (Google).
  • Hyrja me Google, dhe thirrjet zanore e video: Cloudflare ose serverë të ngjashëm për lidhjen, dhe STUN i Google. Këta shohin adresën IP të pajisjes sa zgjat lidhja.
  • OpenStreetMap: harta ku administratori vendos zonën e menzës. E sheh vetëm administratori, dhe shfletuesi i tij kërkon pllakat e hartës nga OpenStreetMap.
  • Punëdhënësi të cilit i aplikon: merr mesazhin tënd dhe CV-në përmes një lidhjeje të nënshkruar që punon 60 ditë dhe nuk kërkon llogari. Pas kësaj, kopjen që punëdhënësi e ka ruajtur vetë e menaxhon ai.
  • Groq (shërbim AI): asistenti (pyetja jote, imazhet dhe materialet që i bashkëngjit) dhe leximi i numrit nga foto e ID-së. Mos shkruaj te asistenti të dhëna të ndjeshme.
  • Autoritetet, vetëm me kërkesë ligjore të vlefshme.

10. Transferimi jashtë Kosovës

Baza e të dhënave rri në BE (Frankfurt), por disa nga shërbimet më lart (Vercel, Groq, Resend, Google, Cloudflare) janë kompani me seli në SHBA dhe mund t'i përpunojnë të dhënat atje. Transferimi bëhet mbi bazën e Klauzolave Standarde Kontraktuale të Komisionit Evropian ose të Kornizës së Privatësisë së të Dhënave BE-SHBA, sipas shërbimit.

Këtyre shërbimeve u japim vetëm atë që u duhet për punën e tyre, dhe ato nuk i përdorin të dhënat e tua për qëllime të veta.

11. Sa gjatë

Sa kohë llogaria është aktive. Kur e fshin, rreshtat e tu hiqen menjëherë dhe skedarët e tu (foto, video, dokumente, foto e ID-së) fshihen nga ruajtja, jo më vonë se 30 ditë. Numri i kartelës hiqet bashkë me llogarinë.

Mesazhet e dhomave të zërit fshihen bashkë me dhomën. Zëri nuk regjistrohet.

Kopjet rezervë të bazës së të dhënave mbahen për pak ditë për rikthim pas gabimeve dhe zëvendësohen vetë. Pas fshirjes, të dhënat e tua mund të qëndrojnë aty edhe për ato ditë, jo më shumë se 30 ditë, dhe nuk përdoren për asgjë tjetër.

Gjurma e veprimeve të administratorëve dhe vendimet e moderimit ruhen sa kohë janë të nevojshme për siguri dhe ankesa.

Hash-et e IP-së e të pajisjes për kufijtë e regjistrimit fshihen pas 30 ditësh. Numëruesit ditorë të asistentit AI fshihen pas disa ditësh. Ndalimet e administratorit ruhen deri sa të hiqen ose të skadojnë, në formën e hash-it dhe etiketës së maskuar.

Pajisjet e hyrjes hiqen kur i mbyll ti, kur e fshin llogarinë, ose pas 31 ditësh pa aktivitet. Interesat e Karrierës fshihen pas 90 ditësh. Raportet e testimit ruhen derisa të zgjidhen dhe fshihen me llogarinë.

12. Të drejtat e tua

Shumicën i ushtron vetë nga cilësimet.

  • Shiko pajisjet ku je i kyçur dhe mbyll cilëndo nga Cilësimet, te «Pajisjet».
  • Eksporto të dhënat e tua si JSON (profili, postimet, komentet, mesazhet e dërguara, storjet, bisedat me AI, XP, aplikimet, njoftimet). Foto e ID-së, sa kohë ekziston, të dërgohet me email, me kërkesë.
  • Ndrysho çdo fushë të profilit.
  • Fshije llogarinë me gjithë përmbajtjen: shih «Fshirja e llogarisë» (/ligjore/fshirja).
  • Fik njoftimet, analitikën dhe statusin online pa e humbur qasjen.
  • Kërko kufizimin e përpunimit ose kundërshtoje përpunimin që bëjmë mbi bazën e interesit legjitim.
  • Tërhiqe pëlqimin (p.sh. për analitikën) kur të duash, pa ndikuar në atë që është bërë më parë.
  • Ankohu te Agjencia për Informim dhe Privatësi. Nëse studion në Shqipëri, mund t'i drejtohesh edhe Komisionerit për të Drejtën e Informimit dhe Mbrojtjen e të Dhënave Personale (IDP); nëse studion në Maqedoninë e Veriut, Agjencisë për Mbrojtjen e të Dhënave Personale të atij shteti.

13. Të miturit

Platforma është për persona 16 vjeç e lart. Nëse mësojmë se një llogari i përket dikujt më të ri, e mbyllim dhe i fshijmë të dhënat. Nëse je prind dhe mendon se fëmija yt ka krijuar llogari, na shkruaj.

14. Siguria dhe cookies

Fjalëkalimet ruhen me bcrypt. Skedarët e ngarkuar nuk janë publikë dhe merren vetëm pas hyrjes.

Cookie-t që vendosim, të gjitha të domosdoshme dhe pa pëlqim: sesioni që të mban të kyçur (30 ditë), id-ja e pajisjes së hyrjes (`sks_device`, 30 ditë, që mbyllja nga larg të punojë), çelësi i rastësishëm i pajisjes kundër abuzimit (`sks_dk`, 1 vit), gjuha, institucioni i zgjedhur gjatë regjistrimit dhe lejet e shkurtra të password-it të harruar (10 minuta). Cookie-t e sesionit e të pajisjes janë HttpOnly, pra faqet nuk i lexojnë dot.

Te shfletuesi ruajmë edhe disa zgjedhje që nuk shkojnë kurrë te serveri: temën, reklamat që fsheh, sugjerimet që mbyll, ku mbete duke lexuar një material, si dhe lejen 24-orëshe e kodin e rastësishëm anonim të lokacionit të menzës. Nuk përdorim cookie reklamash dhe asnjë shërbim gjurmimi të palës së tretë.

Nëse ndodh një shkelje që rrezikon të dhënat e tua, njoftojmë autoritetin brenda 72 orësh dhe ty pa vonesë.

15. Ndryshimet e kësaj politike

Nëse e ndryshojmë këtë politikë në mënyrë që prek të drejtat e tua, të njoftojmë brenda platformës të paktën 14 ditë përpara kur është e mundur. Çdo version të ri e shfaqim me një dritare pranimi dhe nuk vazhdon askush pa e parë. Data në krye tregon versionin e fundit, dhe te Cilësimet, Privatësia, i ke gjithmonë dokumentet dhe datën kur i pranove.

Politika e privatësisë · Studentët.KS